राष्ट्रवादी अजितदादा पवार गटात काँग्रेसचे २०० हून अधिक कार्यकर्ते जाण्याच्या चर्चेला वेग — देसाईगंजच्या राजकारणात हलचल!

देसाईगंज (बाबू कुरेशी) :- देसाईगंज शहरात सध्या राजकीय वातावरण तापले आहे. काँग्रेस पक्षातील युवा व धडाडीचा नेता आणि त्याचे तब्बल २०० हून अधिक कार्यकर्ते राष्ट्रवादी काँग्रेस पार्टी (अजितदादा पवार गट) मध्ये प्रवेश करणार असल्याची जोरदार चर्चा सुरू आहे.

स्थानिक पातळीवर गेल्या काही दिवसांपासून सुरू असलेल्या बैठकींना आणि गाठीभेटींना आता अधिकृत स्वरूप मिळण्याची शक्यता वर्तवली जात आहे.

या घडामोडींमुळे देसाईगंजच्या नगर परिषद निवडणुकीपूर्वी राजकीय समीकरणात मोठा बदल होण्याची चिन्हे आहेत.

युवा नेतृत्वाचा उदय

काँग्रेसचा हा युवा नेता गेल्या काही वर्षांपासून सामाजिक कार्यात सक्रिय असून, युवकांमध्ये त्याचे मजबूत जनाधार आहे. स्थानिक प्रश्नांवर नेहमी आक्रमक भूमिका घेतल्यामुळे त्याची छाप जनतेत चांगली आहे.

अजितदादा पवार यांच्या नेतृत्वशैलीने प्रभावित होऊन हा गट राष्ट्रवादीत जाण्याचा निर्णय घेणार असल्याची माहिती समोर आली आहे. 

राजकीय वर्तुळात चर्चेला उधाण

या शक्य प्रवेशामुळे काँग्रेस पक्षात अस्वस्थता निर्माण झाली आहे. दुसरीकडे, राष्ट्रवादी अजितदादा पवार गटात मात्र आनंदाचे वातावरण असून, स्थानिक पातळीवर संघटना अधिक बळकट होईल, अशी अपेक्षा व्यक्त होत आहे.

अधिकृत घोषणा लवकरच

या प्रवेशाची अधिकृत घोषणा येत्या काही दिवसांत अजितदादा पवार यांच्या उपस्थितीत होण्याची शक्यता व्यक्त केली जात आहे. त्यामुळे देसाईगंजचे राजकारण नव्या वळणावर जाण्याची चिन्हे स्पष्ट दिसत आहेत.

------------------------------------------

🪀 सर्व महत्त्वाच्या बातम्या मिळवा WhatsApp वर लोकनेता न्यूज ला जॉईन व्हा व शेअर करायला विसरू नका👉 https://lokneta.in/