शिरूर अनंतपाळ :- येथील श्री अनंतपाळ ग्रामीण मराठी साहित्य संमेलन आणि डॉ. बाबासाहेब आंबेडकर साहित्य मंच यांच्या संयुक्त विद्यमाने आयोजित ६ व्या राज्यस्तरीय बालकवी संमेलनाच्या अध्यक्षपदी छत्रपती संभाजीनगर येथील नामवंत साहित्यिक डॉ. बबनराव महामुने यांची एकमताने निवड करण्यात आली आहे.
दि. 8 फेब्रुवारी २०२५ (रविवार) रोजी देवरजन येथील प्रसिद्ध 'हत्ती बेट' परिसरात हे भव्य संमेलन पार पडणार आहे. सकाळी १० ते सायंकाळी ५ या वेळेत होणाऱ्या या सोहळ्यात बालसाहित्यिकांचे कविसंमेलन आणि 'किलबिल' शाळेतील पुस्तकाचे प्रकाशन देखील संपन्न होणार आहे.
कार्याची दखल आणि सन्मान
डॉ. महामुने यांनी साहित्य क्षेत्रात दिलेले अमूल्य योगदान, तसेच त्यांचे सामाजिक आणि बहुउद्देशीय क्षेत्रातील प्रगतीशील कार्य विचारात घेऊन आयोजकांनी त्यांना या सन्मानासाठी पाचारण केले आहे. आयोजकांच्या वतीने त्यांना अधिकृत निवड पत्र प्रदान करून हे अध्यक्षपद स्वीकारण्याची विनंती करण्यात आली आहे.
भरगच्च कार्यक्रमांचे आयोजन
या संमेलनात राज्यभरातील बालसाहित्यिक आणि बालप्रेमी सहभागी होणार आहेत. बालमनावर साहित्याचे संस्कार व्हावेत आणि नवोदित बालकवींना व्यासपीठ मिळावे, या उद्देशाने या ६ व्या राज्यस्तरीय संमेलनाचे आयोजन करण्यात आले आहे. हत्ती बेटाच्या निसर्गरम्य परिसरात होणाऱ्या या 'साहित्य जत्रे'मुळे बालसाहित्य क्षेत्रात उत्साहाचे वातावरण आहे.
________________________
Post a Comment