जिजाऊंच्या चरणी साकडे; शेतकरी, विद्यार्थी आणि रयतेच्या हितासाठी शासनाने संवेदनशील निर्णय घ्यावेत!

सिंदखेड राजा | सुरेश हुसे :- महाराष्ट्रातील शेतकरी, विद्यार्थी, कष्टकरी आणि सर्वसामान्य नागरिकांच्या प्रश्नांकडे शासनाने संवेदनशीलतेने पाहून तातडीने निर्णय घ्यावेत, यासाठी माजी महसूल राज्यमंत्री तथा माजी पालकमंत्री अकोला-बुलढाणा सुबोध भाऊ सावजी यांनी मंगळवारी दिनांक ६ ऑक्टोबर रोजी सिंदखेड राजा येथील ऐतिहासिक राजवाड्यात राजमाता माँ साहेब जिजाऊ यांच्या चरणी साकडे घातले. दुष्काळग्रस्त शेतकऱ्यांना तातडीने आर्थिक मदत, सरसकट पीकविमा व कर्जमाफी देण्याबरोबरच विद्यार्थ्यांच्या शैक्षणिक प्रश्नांकडेही शासनाने गांभीर्याने लक्ष द्यावे, अशी मागणी त्यांनी यावेळी केली.

       सिंदखेडराजा ही राजमाता जिजाऊंची जन्मभूमी असल्याने या भूमीला महाराष्ट्राच्या इतिहासात विशेष स्थान आहे. जिजाऊंनी छत्रपती शिवाजी महाराजांना रयतेच्या कल्याणाचा आणि न्यायाचा संस्कार दिला. याच विचारांचा आदर्श समोर ठेवून आजच्या शासनाने शेतकरी, कष्टकरी, विद्यार्थी आणि सर्वसामान्य नागरिकांच्या हिताला प्राधान्य द्यावे, अशी भावना सावजी यांनी व्यक्त केली.

       राज्यातील अनेक भागांत पावसाचे असमान प्रमाण, पिकांचे नुकसान आणि निर्माण झालेल्या दुष्काळी परिस्थितीमुळे शेतकरी आर्थिक संकटात सापडला आहे. अनेक शेतकऱ्यांच्या हातात अपेक्षित उत्पादन आलेले नसल्याने कुटुंबाचा उदरनिर्वाह, पुढील हंगामाचा खर्च आणि कर्जफेडीचा प्रश्न गंभीर बनला आहे.

       या पार्श्वभूमीवर शासनाने नुकसानग्रस्त शेतकऱ्यांना तातडीने आर्थिक मदत द्यावी. कोरडवाहू शेतीसाठी हेक्टरी एक लाख रुपये, तर बागायती शेतीसाठी हेक्टरी अडीच लाख रुपये मदत देण्यात यावी, अशी मागणी सावजी यांनी केली.

      केवळ घोषणांपुरती मदत न राहता ती प्रत्यक्ष शेतकऱ्यांच्या बँक खात्यावर जमा झाली पाहिजे. पंचनामे, कागदपत्रे किंवा प्रशासकीय प्रक्रियेमुळे मदत रखडू नये, यासाठी शासनाने विशेष यंत्रणा उभारून नुकसानग्रस्त शेतकऱ्यांना वेळेत मदत उपलब्ध करून द्यावी, असेही त्यांनी सांगितले.

      नैसर्गिक संकटामुळे पिकांचे नुकसान झालेल्या शेतकऱ्यांना त्यांच्या हक्काचा पीकविमा तातडीने मिळावा. प्रलंबित पीकविमा दाव्यांचा जलदगतीने निपटारा करून पात्र शेतकऱ्यांना नुकसानभरपाई देण्यात यावी, अशी मागणी सावजी यांनी केली.

      वाढता उत्पादन खर्च, शेतीमालाला मिळणारा अपुरा भाव आणि कर्जाचा वाढता बोजा यामुळे शेतकरी आर्थिक अडचणीत सापडला आहे. त्यामुळे शासनाने सरसकट कर्जमाफीचा निर्णय घेऊन त्याची प्रभावी अंमलबजावणी करावी, अशी मागणीही त्यांनी केली.

      ग्रामीण आणि आर्थिकदृष्ट्या दुर्बल कुटुंबातील विद्यार्थ्यांना शिक्षण घेताना अनेक अडचणींचा सामना करावा लागतो. विद्यार्थ्यांना मिळणाऱ्या शिष्यवृत्ती, शैक्षणिक सुविधा आणि विविध सवलती वेळेत उपलब्ध व्हाव्यात, यासाठी शासनाने प्रभावी उपाययोजना कराव्यात, अशी अपेक्षा सावजी यांनी व्यक्त केली.

       शेतकरी, विद्यार्थी, कष्टकरी आणि सर्वसामान्य नागरिकांच्या अडचणी दूर होऊन राज्यात सुख-समृद्धी नांदावी आणि शासनाने रयतेच्या हिताचे निर्णय घ्यावेत, यासाठी माँ साहेब जिजाऊंच्या चरणी प्रार्थना करण्यात आली.

     यावेळी गणेशराजे जाधव, डॉ. गोपाल बच्छिरे, गौतम खरात, अमोल ठाकरे,अजय झोरे, सत्यजित खरात, अमित जाधव, तेजराव मस्के, शैलेश सावजी, रणजीत मरमट, उल्हास भुसारी, गणेश पादरे, प्रशांत जायभाये, गौतम जाधव, बाबासाहेब म्हस्के, जुबेर भाई, भाऊराव जावळे, महावीर सातपुते, नामदेव आनकर, गणेश इंगळे यांच्यासह अनेक कार्यकर्ते व नागरिक उपस्थित होते.