जम्मू- काश्मीरमध्ये मेहुणा राजाच्या वीरपुत्राला वीरमरण!

जवान अंकुश महादेव मिसाळ यांचे देशासाठी सर्वोच्च बलिदान; उद्या शासकीय इतमामात अंत्यसंस्कार

देऊळगाव राजा | प्रतिनिधी :- तालुक्यातील संत चोखामेळा यांची जन्मभूमी म्हणून ओळखल्या जाणाऱ्या मेहुणा राजा गावावर दुःखाचा डोंगर कोसळला आहे. भारतीय सैन्याच्या ३३ मिडीयम रेजिमेंटमध्ये कार्यरत असलेले गावचे सुपुत्र आणि शूर जवान अंकुश महादेव मिसाळ यांना जम्मू-काश्मीरमध्ये देशसेवा बजावत असताना दि. २६ जून २०२६ रोजी वीरमरण प्राप्त झाले. त्यांच्या निधनाच्या वृत्ताने संपूर्ण गावासह देऊळगाव राजा तालुक्यावर शोककळा पसरली आहे.

          सीमेवर देशाच्या सुरक्षेसाठी अहोरात्र कर्तव्य बजावत असताना जवान अंकुश मिसाळ यांनी मातृभूमीच्या रक्षणासाठी आपल्या प्राणांची आहुती दिली. त्यांच्या बलिदानामुळे मेहुणा राजा गावासह संपूर्ण तालुक्याला अभिमानाची भावना निर्माण झाली असली, तरी या दुःखद घटनेने सर्वत्र हळहळ व्यक्त होत आहे.

          वीरमरणाची बातमी गावात पोहोचताच ग्रामस्थ, नातेवाईक आणि परिसरातील नागरिकांनी मोठी गर्दी केली. अनेकांच्या डोळ्यांत अश्रू होते, तर आपल्या मातीतून घडलेल्या या वीरपुत्राने देशासाठी सर्वोच्च बलिदान दिल्याचा अभिमानही प्रत्येकाच्या चेहऱ्यावर दिसून येत होता.

          अंकुश मिसाळ हे शिस्तप्रिय, कर्तव्यनिष्ठ आणि देशसेवेची प्रबळ भावना बाळगणारे जवान म्हणून परिचित होते. त्यांच्या निधनामुळे मिसाळ कुटुंबीयांवर दुःखाचा डोंगर कोसळला असून संपूर्ण तालुक्यातून शोकसंवेदना व्यक्त केल्या जात आहेत.

          शहीद जवान अंकुश महादेव मिसाळ यांचे पार्थिव त्यांच्या मूळ गावी मेहुणा राजा येथे आणण्यात येणार असून त्यांच्यावर दि. २९ जून २०२६ रोजी सकाळी ११ वाजता शासकीय इतमामात अंत्यसंस्कार करण्यात येणार आहेत. या अंत्यसंस्कारासाठी प्रशासनातील वरिष्ठ अधिकारी, लोकप्रतिनिधी, माजी सैनिक आणि हजारो नागरिक उपस्थित राहण्याची शक्यता आहे.

          देशासाठी प्राणांची आहुती देणाऱ्या या वीरपुत्राला अखेरचा निरोप देण्यासाठी संपूर्ण तालुका सज्ज झाला असून, प्रत्येकाच्या ओठांवर एकच भावना आहे—"अंकुश मिसाळ अमर रहे!"

          ईश्वर शहीद जवान अंकुश महादेव मिसाळ यांच्या पवित्र आत्म्यास चिरशांती देवो आणि त्यांच्या कुटुंबीयांना हे दुःख सहन करण्याची शक्ती प्रदान करो, अशी प्रार्थना सर्व स्तरांतून व्यक्त होत आहे.