जालना येथे नवरीला हळद लावण्यासाठी निघालेल्या कुटुंबावर काळाचा घाला
देऊळगाव राजा (ज्ञानेश्वर बुधवत) :- तालुक्यातील दगडवाडी फाट्या नजिक चिखली वरून जालना कडे निघालेल्या एका स्कॉर्पिओ गाडीचा रत्यावरील दुभाजकाला धडकून भीषण अपघात झाला. अपघात दरम्यान गाडी पलटी होऊन गाडी मधील ३ प्रवाशांचा जागीच मृत्यु झाला व गाडीच्या चालकाचा उपचारा दरम्यान मृत्यु झाला असून ५ जणे जखमी असल्याची प्राथमिक माहिती आहे.
अंबाशी ता. चिखली येथील देशमुख कुटुंब उद्या (दि. १८) रोजी लग्न असल्यामुळे आज नवरीला हळद लावण्यासाठी २ वाहने चिखली वरून जालना येथे जाण्यासाठी निघाली असता देऊळगाव मही ते देऊळगाव राजा मधील दगडवाडी फाटा येथे गाडी क्रमांक एम एच २८ बी क्यू ०६०६ या गाडीच्या चालकाचा ताबा सुटून सदरील वाहन दगडवाडी फाट्या जवळील दुभाजकाला धडकून भीषण अपघात झाला.
या अपघातात विलास जयवंतराव देशमुख वय 63,अशोक भीमराव नयाके रा.सवना वाशीम वय 65,वसंत देविदास देशमुख. वय 43 रा.अमानी वाशीम हे जागीच ठार झाले. तर वाहन चालक योगेश लक्ष्मण देशमुख यास छातीत जबर मार लागला व फुफुसात रक्तस्त्राव झाल्याने जालना येथे हलविण्यात आले.मात्र उपचारापूर्वीच त्याची प्राणज्योत मालवली. या भीषण अपघातात मीरा संजय देशमुख, शालिनी अनंता देशमुख, अक्षदा संदीप देशमुख, गोपाळ देशमुख, गजानन आसाराम तौर जखमी झाले. अपघात ग्रस्त वाहनात एकूण ११ जण होते तर मागील वाहनात नवरदेवा सह देशमुख कुटुंबातील व्यक्ती होते. मृतकात दोन जण पाहुणे असून ते मूळचे अंबाशी येथीलच रहिवासी होते.
_____________________________________
Post a Comment