लोकनेता न्युज नेटवर्क
AI-जनरेटेड इमेज
बाई राखीच्या धाग्याची
मला ओढ लय वाटे !
लाला भाऊराया माहा
जणू राजावाणी वाटे !!
बाई राखीच्या धाग्याची
सारी महीमाच न्यारी !
कुकू तांदळाचं ताटं
पोरी उभ्या घरीदारी !!
बाई राखीचा हा धागा
दिसायला तसा साधा !
पन् किमया तं बघा
बंधू पाठीशी हा सदा !!
बाई राखीचा हा धागा
जग त्याच्यापुढे थीटं !
भाऊ गोरापान माहा
त्याची काढू देना दिठं !!
बाई राखीच्या दोऱ्यात
साऱ्या दुनियेची माया !
दिसे भावाचा मुखडा
मोहरून जाई काया !!
बाई राखीचा हा दोरा
जणू प्रेमाचा खजिना !
नवलाख्या हारामंदी
बधू माहा गं नगिना !!
बाई राखीच्या रूपांत
दिसे मायेचा हा डोहं !
दरसाल येई तरी
कधी सुटला ना मोहं !!
बाई राखीचा हा धागा
बोले हुमायून भाऊ !
राणी कर्मवती साठी
संकटात धाव घेऊ !!
बाई राखीच्या धाग्यानं
जणू कमालंच केली !
एका मोगल राजानं
तिला कपाळी लावली !!
बाई राखीच्या दिसालं
हारे भूकं नि तहानं !
त्यानं दुनियेत साऱ्या
केला भारत महानं !!
बाई राखीचं हे रूपं
आसं लोभसं लोभसं !
बहीणीच्या भेटीसाठी
भाऊ चाले कोसं कोसं !!
बाई राखीच्या सूताचा
नाही मावळे सुवासं !
त्यानं भारत मातेचं
नांव केलं देसोदेसं !!
बाई राखीच्या सूतातं
फूलं मायेची गुफली !
राही बांधे राखी, भाऊ
तोले इटाची टोपली !!
बाई राखीचा पदरं
दोऱ्या दोऱ्यानं गुफला !
जणू मायेचा हा मळा
भाऊ माळ्यानं शिपला !!
बाई राखीची किमया
वर्णू वर्णू सांगू किती !
बांधू कस्तुरेच्या हाती
इसरूनं जातीपाती !!
रचना:- ॲड. डॉ. विजयकुमार कस्तुरे.....
९८५०२७५१०४,
९५५२०९४०४९.....
________________________
Post a Comment